د اضحيه (قرباني) اړوند علمي سمينار دائر شو!
د اضحيه (قرباني) اړوند علمي سمينار دائر شو!
۵/ذوالحجة الحرام/۱۴۴۶ هـ.ق
۱۲/جوزا/۱۴۰۴ هـ.ش
۲/جون/۲۰۲۵ م
نن ورځ دوشنبه، د غزني تخنيکي پوهنتون د دعوت او ارشاد آمريت له لوري د پوهنتون د کادري، اداري او خدماتي کارکوونکو لپاره د «اضحيه (قربانۍ)» اړوند یو مهم او ارزښتناک علمي سمينار د پوهنتون د غونډو په تالار کې دائر شو.
سمينار د قرآن کریم د مبارکو آیتونو په تلاوت سره د دعوت او ارشاد آمر مولوي عبدالرحمن سعد له لوري پیل شو.
وروسته نوموړي د سمينار د پیل وینا واوروله، چې پکې يې د اضحيې د فريضې ارزښت، حکمت، د قربانۍ د ورځې فضیلت او د همدې موخي لپاره د یاد سمينار د دائرېدو اړتیا باندې خبرې وکړې.
ورپسې د غزني تخنيکي پوهنتون د مالي او اداري چارو مرستیال مفتي ګلبدین احمد يوسف د اضحيه (قرباني) اړوند مفصل معلومات وړاندې کړل.
نوموړي د قرباني شرعي حیثیت، مشروعيت، د رسول الله صلی الله علیه وسلم او حضرت ابراهیم علیهالسلام د اضحيه فلسفه، فقهي احکام، شرایط، مستحق کسان، وخت، ډولونه، او د قرباني پر وړاندې د امت مسؤلیتونه په تفصیل سره تشریح کړل.
هغه د اضحيې روح، د تقوا پېغام، د اخلاص اصل، او د الله تعالی سره د بنده د ارتباط نښه وبلله، او زیاته یې کړه چې دا سنت د امت د یووالي، ایثار او فداکارۍ ژور پیغام لري.
د سمينار ګډونوالو له دې علمي او دیني پروګرام څخه خوښي وښوده او دا ډول پروګرامونه يې د اسلامي پوهاوي، دیني بیدارۍ او شعوري پرمختګ لپاره ارزښتناک وګڼل، دوی له ادارې څخه وغوښتل چې دا ډول پروګرامونه دې دوام ومومي.
