د غزني تخنیکي پوهنتون د ممتازو محصلینو ستايل
غزني تخنیکي پوهنتون خپل ممتاز محصلان وستايل!
۰۶/ربيع الثاني/ ۱۴۴۶ھ.ق
۱۸/ مېزان/ ۱۴۰۳ل
۰۹/ اکتوبر/ ۲۰۲۴ ميلادي
نن ورځ چهارشنبه د غزني تخنیکي پوهنتون له لوري د ۱۴۰۳هـ ش کال د دوه ګونو پوهنځیو غوره( ممتاز) محصلان ديوې غونډې په ترڅ کې وستايل شول.
په دغه ستاينغونډه کې چې د پوهنتون رئيس پوهنمل فدا محمد محمدي، مرستيالانو، استادانو، اداري کارکونکو، او ګڼ شمېر محصلينو هم برخه لرله، د مولوي صاحب محمدالله حامد په ښکلي اواز سره د قران عظیم الشان د مبارکو ایاتونو په تلاوت پېل شوه، په پيل کې د پوهنتون رئيس ښاغلي پوهنمل محمدي د پرانیستي وینا پرمهال په تالار کې ټولو موجودو حاضرینو ته ښه راغلاست ووایه، محصلینو ته یې د ممتاز محصل د مقام ترلاسه کولو مبارکۍ ترڅنګ وويل هېواد له بل هر وخت اوس ځوانو مسلکي کادرونو ته اړتيا لري او تاسې به دغه تشه ډکوئ، همدارنګه بايد لا زيار وګالئ ، څو په خپل مسلک کې ځانګړي مهارتونه ترلاسه او په ټولنه کې د مثبت بدلون لامل شئ.
ورپسې د غزني تخنیکي پوهنتون د اسلامي ثقافت ځانګي آمر مولوي صاحب قدرت الله منصور وینا وکړه، نوموړي وویل په دغه محیط یعني پوهنتون کې باید د زده کړو ترڅنګ تربیت هم زده کړو، محصل له فراغت سره سم باید د علم ترڅنګ د سترو عزیمو اخلاقو څښتن هم وي، ښاغلي منصور همداراز د قرانکریم د مبارکو ایاتونو د رسول الله ص د احادیثو او د مثالونو په رڼا کې د ادب په اړه هراړخیزي خبرې وکړې.
وروسته د ستاینلیکونو د ویش په لړۍ کې د پوهنتون، پوهنځيو او څانګو په کچه عمومي ممتاز محصلان په ستاینلیکونو سره تقدیر شول، په پای کې یاده ناسته د مولوي صاحب عبدالرحمن سعد له لوري د دعا په ویلو سره پایته ورسیده.
